CLICK HERE FOR BLOGGER TEMPLATES AND MYSPACE LAYOUTS »

أهلا وسهلا نورتنى

الاثنين، 15 ديسمبر، 2008

عايزين نغير من نفسنا

السلام عليكم و رحمة الله و بركاته
أنا كتبت لكم النهارده موضوع وعايزه كلنا نشارك فيه . كل واحد فينا أكيد فى حاجات بتعجبه فى الناس اللى حواليه و حاجات تانيه مش بتعجبه ، و أكيد برده كل واحد فينا فيه مميزات و فيه عيوب . و أكيد فينا فى ناس عارفه عيوبها وفى ناس مش عارفه عيوبها إيه .
و هو ده الموضوع اللى عايزه اتكلم معاكم فيه ( عايزين نغير من نفسنا ) ندور على عيوبنا و نحاول نصلحها .
ربنا سبحانه و تعالى قال فى كتابه الكريم : بسم الله الرحمن الرحيم" إن الله لا يغير ما بقوم حتى يغيروا ما بأنفسهم " صدق الله العظيم .
إيه رأيكم يا جماعة لو كل واحد مننا يسأل نفسه دلوقتى إيه العيوب اللى فيا والمفروض إنى أغيرها.
أنا أول واحده هاسأل نفسى السؤال ده , لقيت إن الحاجه اللى مش بتعجبنى فى نفسى هى إن لما حد بيظلمنى أو يأذينى مش بقدر أنسى له
و بحاول دايما أنسى و أغير من نفسى عشان ربنا يسامحنى ويغفر لى أنا كمان .
عايزه منكم يا جماعه كل واحد هنا دلوقتى يقول عايزيغير فى نفسه إيه و إن ماكانش هنا يبقى بينه و بين نفسه .

18 التعليقات:

نبض الروح يقول...

بوست جميل جدا سلمت أناملك عليه
فعلا جميل أن نحاسب أنفسنا قبل أن يحاسبنا الله والأجمل أن نعرف أخطاءنا ونصححها ونبحث عن عيوبنا ونصلحها
فنحن بشر لكل منا عيوبه ولسنا منزهين
ورحم الله امريء أهدى إلي عيوبي :)

zainab يقول...

شكرا لكى حبيبتى نبض الروح

بسنت يقول...

عليه افضل الصلاه والسلام
شوفى طبيعى الواحد كل فتره بيقعد مع نفسه ويشوف عمل ايه صح وايه غلط وايه اللى فعلا مفروض يحصل
زى ما بيخطط لحياته بيخطط لخطواته على قدر ما يقدر
وطبعا ابدأ بنفسك شئ جميل بس الدعوات لما بتكون جماعيه بيكون تأثيرها اقوى بكتير
سلمتى على النصيحه والتذكره الممتازه
ودمتى بخير

zainab يقول...

شكرا لكى حبيبتى بسنت

********

بارك الله فيكى

فارس القمر يقول...

مدونه جميله والبوست اجمل

الحاجات اللى بتعجبنى فى الناس حاجات كتيرة قوى طيبه قلبهم وحنيتهم ودا لانى بعاملهم نفس المعامله لانى احب اتعامل زى مابعامل الناس اللى مش بيجبنى من اللى حوليا من المدونين انك مثلا انت تكتب تعليق فى غايه الجمال ردا على موضوع اجمل وتلاقى انت تكون كاتب موضوع وتعليقاتوا كتير والشخص دا يحبطك ويدخل يقولك كلامك جميل وتقبل مرورى مستخصر يكتب تعليق يليق بيه

العيوب اللى فيا مش هقولها لان طبيعة
اى بنى ادم انوا مش كامل الاوصاف
الحاجات الحلوة برضوا مش عقولها لان مابيشكر فى نفسوا الا ابليس

فى النهايه موضوعك جميل قوى
وكان قريب من موضوع كنت هكتبوا لكن خلاص انتى سبقتينى

دمتى بخير وابداع

تحياتى

zainab يقول...

شكرا لك فارس القمر

لقد شرفتنى زيارتك

*shosho* يقول...

السلام عليكم
~~~~~~~~~~~
مدونتك حلوة أوي
خاصة الموضوع الاخير دا فكرته جميلة جدا
~~~~~~~~~~~~~~~~~
سـ»-(¯`´¯)-»ــلام

zainab يقول...

شوشو
شكرا لك
نورتينى فى المدونه

♥ ملكة الأحساس ♥ يقول...

أهلا بتلك الأخت الصادقة
أهلا بملامح الفجر البارقة
:
:
تدوينة من سلسبيل عبق الروحانية جميل
ولها في القلب منى حظور دوما ذو تفعيل
:
:
ياحبيبتي ...(؛
لاحرمك ربي أجرها
دعواتي..
بالرضا من ربنا الرحمان
بجنة فردوس تغشاكى بأمان

zainab يقول...

حبيبتى ملكة الإحساس
نورتينى وشرفتينى
بارك الله فيكى

انسانةعادية فى عالم مش عادى يقول...

الله يكرمك يارب ياجميل البوست والله حلو جدا وانا بصراحة يمكن سبب اساى فى حياتى انى ممكن اكون مقتنعة بشخصيتى 100 فى 100 ويجى اى انسان ويشكك فيا لانى بصدق على طول ودى مشكلتى وان شاء الله احاول اغيرها يارب
وبالنسبة لمشكلتك اتعلمى التسامح بالتدريج انتى قبلك ابيض ومش بتعرفى تزعلى من انسان ابدا
مرسيى ليكى ياقمر على الورد الجميل ربنا يخليكى ليا يارب

zainab يقول...

ربنا يخليكى ياأيوش يا حبيبتى

إنتى بنت عسل و مدونتك جميله

بالموضوعات اللى فيها وتدل على جمال

شخصيتك و ارادتك

بـسـمـــة صـــــلاح يقول...

السلام عليكم
ازيك يازوزو وحشتيني جدا والله اخبارك ايه
...
على فكره الميل بتاعي بايز مش راضي يفتح خالص أنا خلصت الرسمه مش ناقص غير ان عنيكي الحلوين يشوفوها
...
اما عن البوست فكرته جميلة أوي
اناكل يوم لما بروح انام بحاسب نفسي عملت ايه غلط انهردة ايه الحاجه الكويسه اللي عملتها وكدا يعني
وعموما بكتب في ورقه السلبيات اللي فيا والايجابيات
ايه رايك في الفكرة دي
هههههه
السلبيات بتعقدني من نفسي خاصة اللي بحاول اغيرها ومبتتغيرش
....
معلش طولت عليكي ياحبيبتي
خدي بالك من نفسك
***
دمت بود
تحيـــــــاتي:)

emey يقول...

عموما انا الحاجة السيئة اللى نفسى ابطلها ان لا لما حد بيعمل فية حاجة وحشة وبعدين اشوفة اكلمة وانسا اللى علة خالص كانة لم يعمل شئ ودة الناس بيسموة عبط نفسى اخد موقف من الناس وعقبهم والحاجة الكويسة انى بحب الناس حولية يكونو بيحبو بعض ويعيشو فى حب وسعادة تحياتى لمدونتك واهتمامك لمعرفتى بالمدونة الجديدة نور على نور وارجو زيارتى دوما

zainab يقول...

بوسى حبيبتى

فكره جميله قوى اللى انتى قلتى عليها
إن احنا نكتب مميزاتنا و سلبياتنا
بس لازم نحاول

zainab يقول...

ايمى حبيبتى
دى حاجه كويس انك تنسى أى أسيه شوفتيها من أى حد
طب ياريت أنا أقدر أكون زيك

*************

تحياتى ونورتينى و إن شاء الله أزورك قريب

ذات النطاقين يقول...

فعلا لازم نبدأ بنفسنا

ولا حالنا مش هيتغير

أنا برضو مش بنسي الاساءة بسهولة .. بس بدأت اعود نفسي علي التسامح لاني سمعت حلقة لدكتور ابراهيم الفقي عن قوة التسامح

ربنا يهدينا جميعا ..

zainab يقول...

ذات النطاقين

ربنا يقدرنا جميعا و نكون متسامحين

شكرا على مرورك