CLICK HERE FOR BLOGGER TEMPLATES AND MYSPACE LAYOUTS »

أهلا وسهلا نورتنى

الاثنين، 5 يناير، 2009

هل ترضين الزواج بمن هو أقل منك ِ؟؟؟

السلام عليكم و رحمة الله وبركاته

النهارده أنا جايبه لكم موضوع بقى منتشر قوى اليومين دول والموضوع ده من الحاجات اللى بستغربها قوى ومش عارفه صح و لاغلط
و عايزه رأى كل بنوته تقرأ الموضوع ورأى كل شاب برده مش مشكله
طبعا إحنا عارفين إن عشان الزواج يكون سليم و ناجح لابد من التكافؤ بين الزوجين
و التاكافؤ معناه المساواه أو المماثله
و التكافؤ بين الزوجين يعنى أنه لابد أن يكون الزوجين متساويين أو متقاربيين فى المستوى الدينى و الخلقى و الإجتماعى و العلمى و الثقافى و التفكيرى و المادى
فى الأيام دى بقيت ملاحظه ان فى ناس كتيرماعادتش مهتمه بموضوع التكافؤ خالص
فمثلا أنا أعرف بنت معاها كليه مؤهل عالى و وافقت على الزواج من شاب لا يحمل أى مؤهل
أرى فتاة أخرى حاصلة على مؤهل عالى و توافق على الزواج بشاب معه مؤهل متوسط أو دون المتوسط
أنا ذكرت مثل عن التكافؤ العلمى لأن هو ده اللى شايفه إنه منتشر قوى فى الأيام دى
سيدنا محمد عليه الصلاة و السلام قال من ( أتاكم من ترضون دينه و خلقه فزوجوه ) فهل يكفى التكافؤ الدينى فقط فى الزواج و التخلى عن أجزاء التكافؤ الأخرى ؟
أنا سؤالى هنا موجه للبنات خصيصا
هل ترضين بالزواج بمن هو أقل منك فى المستوى العلمى و الثقافى و التفكيرى ؟
هل تقبلين الزواج بشحص لا يحمل أى مؤهل أو يحمل مؤهل متوسط أو دون المتوسط؟
هل تقبلين الزواج بشخص حاصل على مؤهل عالى و لكن يعمل بمهنة أخرى مثلا سباك أو نجار أو استرجى أو نقاش أو مبلاطاتى يعنى بيبلط سيراميك و بلاط ؟
مع العلم أننى لا أقلل من مهنة أى شخص أو من قدره
هل تقبلين الزواج بشخص أقل منك فى المستوى الدينى على اعتبار انك ممكن تغيريه و انت لا تعلمى ان كان سيتغيربعد الزواج أم لا ؟
أنا فى انتظار أرائكم و تعليقاتكم

45 التعليقات:

انسانةعادية فى عالم مش عادى يقول...

السلام عليكم ورحمة الله وبركاته
ازيك يازينب كلما ادخل المدونةالاقى فيها حاجةجديدةوجميلة
الردعلى موضوعكانفى بعض الحاجات مش هقدر انسى التكافؤ فيها منها الاخلاق لازم يكون فى مستواى او اعلى طبعا لكن ااقل تبئا كارثة ههههههههههه
بالنسبة للمستوى العلمى والثقافى انا عن نفسى برفض انى ارتبط بانسان ااقل منى فى المستوى ده بالظبط ومش المقصود التعليم لان التعليم فى بلدنا مش مقياس ابدا للتفوق ده حظ وكوسة
لكن اللى اقصده تفكيره وثقافته
بس طبعا مش هاخد واحد مش متعلم او مؤهله اعدادية او متوسط
والله ش عيب فى اصحاب المؤهلات دى بس علشان بجد فى الزمن ده هتلاقى اغلبهم سلوكه واخلاقه مش تمام بجد
اما التكافؤ المادى ده شئ مش اوى يعنى لان المادة مش كل حاجة
وتسلم ايديكى ياجميل على البوست

ريمان يقول...

السلام عليكم يا بنت بلدى

بصى يا قمر

قبل اى شىء

انتى وحشانى يا وحشه

وخلى بالك انا اول تعليييييييييييق

ها

هاتى بونبونى بقه

بصى يا عثل

كل قاعده وليها شواذ

انا اعرف ان البنت اما تاخد واحد اقل منها فى المستوى الاجتماعى والثقافلا بتتعب معاه جدا وفى بنات بترتاح
يعنى مثلا ممكن يكون واحد مش متعلم خالص

لكن بيكون مثقف جدا ومتفاهم مع زوجته

وفى كمان انا اعرف واحده متزوجه دكتور جامعه وبيطفحها الدم وبيضربها قدام الجيران ومخلى حياتها قرف

مع انه متعلم تعليم عالى

يعنى عايزه اقولك انها مش قاعده عامه طبعا

بالنسبه لينا هنا فى دمياط انتى عارفه ان اكتر شباب دمياط صنايعيه

يعنى تلاقى واحد مخلص كليه حقوق او تربيه او تجاره وبيشتغل نجار

او سباك او امياجى

ده مش يقلل من شانه

لان دمياط كلها كده

وانا عن نفسى اوافق وحتى لو تعليمه متوسط ماشى لكن دون المتوسط لاء مش ينفع بلاش احسن

marmar يقول...

حبيبتي زوزو المتألقه
حبيت أشارك برأيي في التدوينة الحلوة دي اللي فعلا بقت منتشره جدا اليومين دول وانا ملاحظاها كتير من بنات وشباب مصريين وعرب بشكل عام
اولا مينفعش ارتبط بجد اقل مني في المستوى الثقافي لان تفكيرنا مش هيبقى واحد ولا دماغنا واحده ولا رأينا ولا تعبيرنا ولا افكارنا واحده
يعني بالظبط اكني قاعده من خيال
وبالنسبة للمستوى للمادي ممكن اه لان ربنا الي بيرزق مش احنا ولكن ميمنعش
اني اعيش في مستوى كويس مش في عشه زي ما بيقولوا
اما بالنسبه للمستوى الديني ده اهم حاجة طبعاااا لان اللي مش بيخاف ربه عمره ما هيخاف عليا وانا مستأمنش نفسي مع حد مش بيخاف ربه وزي ما رسولنا الكريم قال في حديثه الي كتبتيه معنا كلامه ان لازم الدين يكون موجود عشان الحياه تكمل وتستمر بنا.
وفي الاول والاخر كله نصيب وممكن تاخدي حد بعيوب كتير بس تعرفي تغيريه للاحسن تغيريه صح
لان وراء كل رجل عظيم امرأه أعظم
تحاتي ليكي يا قمرررررة

zainab يقول...

حبيبتى أيوش

حبيبتى ريمان وانتى كمان وحشانى

حبيبتى ريم


بجد و الله نورتونى

انتم دايما فى الأول

ربنا يسعدكم

ghorBty يقول...

السلام عليكم

ربنا يبارك لك يازينب يا رب ويصلح حالك

قبل ما ارد علي الاسئله احب اقول شئ اهم شئ في الراجل من وجهة نظري انه يكون عنده اخلاق ويحترم عقل البني ادمه اللي معاه ويكون عنده حياء لانه لو عنده حياء حياءه هيمنعه يعمل حاجات كتير جدا من اللي بنسمعها اليومين دول من الاهانه والضرب وقله الادب اللي باللفاظ والكلام الجارح

الاجابه
الصراحه التكافؤ في كل شئ مطلوب واقول علي حاجه الاول احنا نتجوز ليه بيقولوا الجواز استقرار طيب يبقي لازم احط قدام عيني اني بجوز علشان استقر مش علشان اجيب لنفسه بلاوه فلازم اختار كويس وبهدوء مش علشان اخد لقب متزوجه اضحي بسعادتي واستقراري واختار اي حد كدا والسلام

المستوي المالي مش في دماغي اوي بس يكونوا ناس كويسين واخلاق وربنا هو الرزاق فكم من اناس كانوا علات القوم واصبحوا يتكففون الحاجه اهم شئ يكونوا ناس بيخافوا ربنا ورزقهم حلال

اما المستوي التعليمي والثقافي وهناك فرق في الاثنين فكم من متعلم ليس مثقف وكم من مثقف تجدي تعليمه متوسط انا الصراحه لا اقفبل باي حد لا يجمع بين الاثنين لاني عايزه واحد يتعامل معايا بالعقل لان هيكون بينا اولاد ان لم نتفق انا واياه علي نفس التفكير والاقتناع بكيفيه تربيتهم في ظل الفساد المنتشرد في مجتماعنا دلوقتي يبقي مالهوش لازمه واكون جبت لنفسي بلاوه ففي الجانب دا لا اقبل وربنا يستر وكله في الاخر نصيب ورزق ربنا يكتب لنا الصالح

اما من ناحيه التدين اسال الله ان يرزقني بزوج متدين علي حق وليس منظر او كلام رجل يتقي الله فيا ويكون قدوته النبي عليه الصلاة والسلام الذي قال خيركم خيركم لاهله وانا خيركم لاهلي ونعيش في ظل طاعة الله احنا واولادنا في الدنيا حتي نلتقي في الجنه ان شاء الله فارحين مستبشرين

قولي يااااارب واياك وكل البنات اللهم امين


يارب اجيب نمره كويسه

صحيح لو عندك المواصفات ديه لا تبخلي عليا هههههههههههه واهم اشي الدعاء


غربتي

zainab يقول...

أميرة حبيبتى

ربنا يسعدك و يرزقك الزوج الصالح اللى يهنيك و ياخد باله منك و يحطك جوه عنيه انت و كل البنات

يارب اللهم امين

لو كان عندى عريس ماكنتش عزيته عليك
هههههههههههه

تحياتى

فارس القمر يقول...

السلام عليكم

تعليقى على هذا الكلا ملخصه محدود وهو ليس بما تقولين ولكن هيا فترة الخطوبه هيا اساس وبدايه للطريق السليم اما اذا تحكم الاهل على البنت وهيا لاتقبل فهذا غطاءٌاسود للايام القادمه
والزوج نفس ما خدث للزوجه فالسليم لهذا الموضوع هو التعارف والقبول فى فترة الخطوبه
نعليق اخر على موضوع التكافؤ الذى ذكرتيه فى موضوعك
حال البلد لايسمح بتعيينى فى مهنه حسب مؤهلى العالى او المتوسط او الاقل
فلظروف الحياة مضطر ان اعمل فى اى مجال
المهم ان القرش لايغضب الله يعنى يبقى حلال ودا الاهم

تحياتى

zainab يقول...

فارس القمر

أعلم حقا ان ظروف البلد لا تسمح بتعيين المؤهلات لهذا يلجأ الشبا ب للعمل فى اعمال اخرى لكن أحيانا يافارس أعمالهم بتحكم عليهم أو بيكتسبوا منها صفات ممكن لا تتناسب مع الفتاه
يعنى ممكن تلاقى الشاب يتلفظ بألفاظ حارجه أو يزعأ أو يسب متأثرأ بمهنته
يارب تكون فهمتنى يا فارس

تحياتى

فارس القمر يقول...

السلام عليكم

لكل منا لحظه غضب ومش الاصابع تتشابه

مسالة انك ترتبطى بشخص اقل مؤهل او مجال شغلوا يخليه شخص غير محترم

اظن الرد واضح لما يجى يتقدم مثلا شخص لاختى فاحنا بنسال عنوا فى مكان مسكنوا ومكان شغلوا وبنعرف عنوا كل حاجه

دا بيبقى بالنسبه للدين والاخلاق

انا بقى لو شاء القدر واتخطبوا فدى تبقى فترة تعارف وامتزاج بين اختى اللى اخذت عليها المثل وبين الشخص دا

ومش كل شاب يعمل فى اى مجال بظروف شغلوا يتعلم انوا يقول الفاظ جارحه

طبيعه شغلى عندى عمال كتير ومعاهم مؤهلات عاليه وسبقت وقولت الحكومه مش بتشغل حد وهما فى غايه الاحترام والدين

تحياتى لك وانا متابع لو فى تعليق اخر

emey يقول...

اولا كل سنة وانتى يبة بمناسبة عاشورة

ثانيا الموضوع جميل وطبعا انا لا اقبل ان يكون زوجى اقل منى فى اى شىء لا تعليم ولا ثقافة ولا تفكير ولا اى شىء لان بسهولة البنات بتوع اليومان دول عايزين اللى يشكمهم ويديهم على دماغهم مش عايزين الانسان الطيب الحنين


تحياتى

العاشقه يقول...

اولاً وحشتينى جدا جدا جدا يازوزو
بجد والله كنت مفتقداكى ومفتقده مواضيعك الجميله
موضوعك النهارده جامد جدا
بس تعرفى
انا حاسه انى لو حبيت حد بجد وهو كمان كان بيحبنى مش هيهمنى اى شىء تانى
يمكن تقولى عليا رومانسيه او مجنونه او اى حاجه تانيه
بس بجد انا مفتقده الحنان والامان والحب
ومستعده اتنازل عن اى حاجه فى الدنيا علشان الاقيهم
مهما كانت الحاجه دى
اتنازل عن مستوى تعليمى او مادى او اى حاجه تانيه
ده احساسى
واكيد كل واحد له وجهة نظر
اشكرك ياحبيبة قلبى على طرحك للموضوع الجميل ده
ودايما مستنين كل جديد منك
تحياتى
نور

zainab يقول...

فعلا يا فارس مهم قوى اننا نسأل عن الشخص فى شغله من اصحابه من بجوار مسكنه

ربنا يصلح أحوال شباب المسلمين و يشتغلوا كلهم

جزاك الله خيرا

zainab يقول...

إيمى

ربنا يكرمك ان شاء الله

كل سنه و انت طيبه و بخير

****************

العاشقه

ربنا يسعدك و يبعتلك واحد أخلاق و حنين

تحياتى

mahasen saber يقول...

شوفى يا زوزه التكافؤ الوحيد بين الزوجين هو حسن الخلق يعنى لو البنت اتجوزت واحد مش متعلم بالقدر اليى هيا وصلتله فى مراحل التعليم بس ولد يملك من حسن الخلق وتحمل المسئوليه ما لا يحمله غيره فبلا شك هنا يا اهلا بالزواج والبيوت الناجحه
انما ايه العبره لو اخدت اينشتاين مثلا بس لا عنده لا دين ولا خلق

ده رايي اليى طلبتيه يا قمر
والله اعلم وادرى

zainab يقول...

حبيبتى محاسن

شكرا على زيارتك لى

بس ان جيتى للصراحه يمكن يكون عندك حق
بس مش عارفه برده؟؟؟؟؟

انت تسال والكمبيوتر يجيب يقول...

عزيزتنازينب
السلام عليكم ورخمة الله وبركاته
والله موضوع مهم...وممكن نعمله حلقه فى برنامجنا ومعه تعليقات زوار مدونتك عليه....او ننقله عندنا بتعليقاته لمدونتنا وننتظر تعليقات زوار مدونتنا بالضافه للتعليقات الموجوده بالفعل
ايه رايك ...

zainab elmosalamy يقول...

أنت تسأل و الكبيوتر يجيب

شكرا لك على تشريفك لى بالزيارة

ممكن حضرتك تنقل الموضوع بتعليقاته إلى مدونتكم و برنامجكم الجيد الجميل وهذا يشرفنى

تحياتى

ساره يقول...

السلام عليكم ورحمة الله وبركاته

انا راح اقولك انا كيف افكر
بالنسبه لي اهم من التعليم انه يخاف الله فيني ويحترمني ... انا اتكلم عن اللي فاهمين الدين صح مش المتعصبين
طبعاهذا لا يعني ان التكافؤ الثقافي مش مهم بس معناتها ان هذا الانسان لايمكن يأذيني عشانه يعرف ربه ويخاف منه

عمر ما كان التعليم مقياس ثقافي ... ياما ناس معاهم دكتوراه ودماغتهم جزمه قديمه وفيه ناس كثير صنايعيه مثقفين واخلاق ... انا عاشرت بنات كانوا ازواجهم معاهم دكتوراه وماجستير واخلاقهم زفت

الوحده منا ترسم فارس احلامها الكامل من كل الشوائب بس اذا جاها الانسان الصح تتوكل على الله بألاستخاره وهو راح يدلها على الاختيار اما الارتباط اولا
موضوع جيد لنقاش يا زوزو :)


انا اقيس الشخص كادين اولا ثم

zainab elmosalamy يقول...

حبيبتى ساره

ربنا يزقك بالزوج الصالح

بس أفهم من كده انك ممكن تتجوزى واحد مش معاه أى مؤهل أو تتجوزى واحد معاه مؤهل متوسط أو واحد صنايعى ماتخافيش يكون متأثر بصنعته أحيانا بيكتسبوا من مهنتهم صفات ماتتناسبش معاكى

MaNoO يقول...

بصرحة التكافؤ لازم يموت موجود او على الأقل التقارب لان كدا كدا بتظره الفروق بعدين سواء كان اجتماعى او ثقافى او اى شىء دى مش علاقة شهر ولا اتنين دى حياة كاملة يعنى المفروض يدرو على الحد فيه اق عيوب واقل تاثير عليه فى المستقبل انتى سألتى بالنسبة للبنات وانا قلت رأيى عامة

تحياتى وتمنى اتواصل بالمدونات

ساره يقول...

مهم انه يكون مثقف يعني عقله متفتح يعني تفكيره يناسب تفكيري بس ابدا مش شرط يكون جامعي
فيه صنايعيه يقتبسون كلمات والافاظ بحكم المهنه بس هو عارف انه اللغه هذه بس مقبوله فى مكان عمله عشان يقدر يمشي نفسه فى المجال اللي هو فيه ويعيش بينهم
بس فى نفس الوقت يعرف انه لكل مقام حديث وهنا تبان الثقافه ياقمر

zainab elmosalamy يقول...

Mano0


شكرا لك على زياتك و الإدلاء برأيك

نورتنى

تحياتى

zainab elmosalamy يقول...

حبيبتى ساره

هقولك ماشى يا ساره طيب لو استحدم الألفاظ دى معاكى و قدم المبرر
اترضين ؟؟
هل يوجد هناك أو تقبلين المبررر لإستحدام هذه الألفاظ؟؟

تحياتى

غير معرف يقول...

أختى حبيبتى الموضوع رائع
أرى ان الزواج اقل منى فى المستوى التعليمى مرفوض تماما
كل مايهمنى المستوى الدينى والأخلاقى أولا ثم المستوى التعليمى و الثقافى

ساره يقول...

ايه زوزو انتي بتصعبيها كده ليه :)

شوفي يا قمر مستحيل يكون انسان اخلاق ومثقف ويتلفظ الفاظ مش مقبوله

يعني انا الانسان اللي اتمناه لازم يكون على دين وخلق ومثقف

المهم انتي شوقتيني انتي ايه رائيك فى الموضوع نفسه :)

zainab elmosalamy يقول...

ساره حبيبتى

هو ده اللى انا عايزه اوصل ليه

مش معقوله يكون مثقف و على أخلاق و يتلفظ ألفاظ مش كويسه

تحياتى ياقمر

ذات النطاقين يقول...

بس انا بشوف بنات من صيدلة وطب ما ترضاش تتجوز الا دكتور و انا ضد المبدأ ده
لكن
لازم يكون في تكافؤ .. يعني نفس المؤهل ..ماتبقاش هي دكتورة و هو معاه اعدادية مثلا .. عشان حتي ما يحصلش في يوم من الايام وتعايره ..

ده رأيي

والله أعلم

ريهام العربي يقول...

بصراحه انا عن نفسي لا طبعا ويمكن لاسباب تخصيني انا
يعني مثلا من ضمن الاسباب دي انا خايفه اصلا من الطلاق اللي بقي شاائع قوي الايام دي فعشان اقلل نسبه حدوثه اني اخلي بالي بموضوع التكافؤ ده وهو اهم جزء من وجهه نظري يعني لو مفيش تكافؤ مادي ممكن مش يهمني الموضوع قوي زي ما يهمني التكافؤ التعليمي والديني والاخلاقي وبذات التعليمي ده انا عاوزه واحد اعلي في المستوي يعني معاه دكتوراه او بكلريوس او علي الاقل عندو الاستعداد لده لان انا كمان عاوزه ده ومش عاوزه اتجوز واحد يحطمني او يغير مني
ده غير الاخلاقي اكيد واللي مستحيل اتنازل عنه


وبعدين انا في علاقاتي الخاصه زي الصداقه مثلا يا باخدهم باكدج علي بعضيهم واستحملهم بحلوهم ومرهم يااخلي في حدود ومن بعيد لبعيد عشان مخسرهمش ومبحاولش اغير فيهم اي سلوك سئ الا لو كانت دي رغبتهم لوحدهم فممكن اساعد غير كده لا طبعا مش سهل ان الواحد يتغير ولا حتي عشان واحد بيحبو الموضوع صعب وعن تجربه


بس علي فكره ممكن يبقي في احتمال اني اقبل بواحد مفيش تكافؤ بيني وبينه بس طبعا ميكونش التكافؤ اقل مني بكتير ولسببين
الاول اني اكون كبرت وعنست
والتاني اني اكون اتخبط في عقلي وحبيته :D

بس :) ودومتم سوري علي التطويل موضوع لذيذ ومستنيه منك كل جديد

تحياتي يا قمر

zainab elmosalamy يقول...

ذات النطاقين

صحيح يا حبيبتى انا كمان شفت بنت تكون دكتوره تقول عايزه دكتور

هى وجهة نظر بس لو عممناالموضوع تبقى مشكله فعلا لو كل واحد قال أنا عايز زى المؤهل بتاعى

تحياتى


****************

ريهام العربى

نورتينى يا قمر

و انتى برده متفقه مع الكثير من الأراء اللى وصلتنا لحد دلوقتى
ربمنا يرزقك الزوج الصالح و مش هتنعسى ان شاءالله

تحياتى

يا مراكبي يقول...

أتحدث هنا من واقع التجارب الحياتية التي مرت من حولي

هناك خلاصة هامة إستنتجتها وهي: إن أي درجة من عدم التكافؤ في أي بند من بنود لحياة ستظل دائما نواة لمشكلة مستقبلية لن تظهر إلا عندما يقع الزوجين في إختبار ما خاص بتلك النقطة التي بها عدم تكافؤ

ولنوضح بمثال

تزوج رجل غني ذو تعليم متوسط بفتاة تخرجت من المدارس الأجنبية وتتحدث الإنجليزية بطلاقة .. حدث ذات يوم أن جاء إبنهما بخطاب إستدعاء من المدرسة الأجنبية التي يدرس فيها الولد .. وعندما ذهب الوالدان كانت الأم هي من تتحدث بالإنجليزية مع الناظر والمدرسين بينما يقف الوالد عاجزا عن الفهم والمشاركة والتدخل لحل مشكلة إبنه إذا أمكن .. وهنا ظهر جليا عدم التكافؤ بين الوالدين

قد يبدوا المثال سخيفا بعض الشيء .. لكن ذلك الحدث وإن ظهر بسيطا فهو قد ترك أثرا في نفسية كل منهما .. فكلهما شعر بالحرج مام الناس بسبب الطرف الآخر

zainab elmosalamy يقول...

يا مراكبى

و قد اتفقت فى الرأى أيضا مع باقى المعلقين

أنا شايفه ان مثالك المذكور فعلا انت على حق فيه

تحياتى

الجواز و سنينه يقول...

موضوع تحفه بجد
و فعلا التكافئ مطلوب
بس مش بتتحسب اوى كده
يعنى المفروض الواحد يكون كويس فى حاجات معينه
مش لازم يكون متدين اوى بس المهم يكون بيصلى و اخلاقه رفيه مش لازم يكون بيقوم الليل و بيبات فى الجامع
لازم يكون ماديا كويس بس مش مليونير
لازم يكون ثقافيا كويس و مش لازم يكون احمد زويل
كده الدنيا تمشى من غير ما نحبكها

mostafa rayan يقول...

بصي يازينب
طبعاالتكافؤ مهم جدا لكن في ظل ظروفنا الحالية
البت ممكن تتجوزواحد صنايعي لأن داخله اكتر من اللي معاه شهادة يعني دي هتشيل دي
اما بالنسبة لسؤالك فانا هقولك على رأيي يصراحة انا الحمد لله معايا شهادة عليا
لكن لو لاقيت واحدة معاها معهدد سنتين وهتعاملني معاملة حلوة وتشيلني جوة عنيها وتسمع كلامي اكيد هفضل عليها واحدة جامعية تقولي اقولها يمين تروح شمال بالعند وتتعامل معايا من منطلق الند بالند وانا زي زيك والكلام اللي بيقولة كتير من البنات الجامعيات دلوقتي
تحياتي لك ودمت بخير

zainab elmosalamy يقول...

مصطفى ريان

يعنى يا مصطفى عشان خاطر الظروف و الفلوس نتنازل عن التكافؤ العلمى ؟؟؟؟

خلاص بقى ده الحل؟؟؟؟

يا مصطفى ممكن الشاب لما بيشتغل فى صنعه بيكتسب منها صفات مش كويسه تؤدى الى فشل العلاقه وده بيحصل

نرضى بكده عشان الفلوس؟؟؟؟؟؟

تحياتى

zainab elmosalamy يقول...

مصطفى الريان

ايه ده يامصطفى مش كل بنات الجامعات عنديين كده

ربنا يرزقك ان شاء الله الزوجه الصالحه اللى تشيلك جوه عنيها يا سيدى و تسمع كلامك

دعوه حلوه (دعوه بظهر الغيب)

نورتنى مع تحياتى

mostafa rayan يقول...

اختى العزيزةزينب
اشكرك على دعوتك ليا بظهر الغيب
ربنا يستجيب منك ويكرمك انتي كمان بواحد جميل يشيلك جوة عينيه
اما جواب سؤالك هتلاقيه عندي
مش عايزادوخك بس حابب انك تيجي عندي كتير

حتى تشرق الشمس يقول...

السلام عليكم ورحمة الله وبركاتة
كيف حالك زينب يا رب تكونى بخير
انا شخصيا مش موافقة
لية ؟؟؟؟!!!!!
لان لو البنت تزوجت واحد مش من نفس المستوى الدينى والاخلاقى والمادى والاجتماعى والتعليمى
وخاصة التعليمى دا
هتشعر بعد كدا انها افضل منة والستات والبنات او انا اتكلم يعنى عن نفسى بحب اوى احس ان زوجى افضل منى الف مرة
دا رأى
دمتى بالف ود

zainab elmosalamy يقول...

مصطفى ريان

جزاك الله خيرا على دعائك لى

وماشى هجيلك يدوب مسافة السكه بس يارب ألاقيك كتبت حاجه جديده

تحياتى

zainab elmosalamy يقول...

عزيزتى حتى تشرق الشمس

أنا بخير و الحمد لله

فعلا رأيك مقنع

تحياتى

أنا حر يقول...

مدونة حلوة قوي والموضوع متميز بس بيتهيألي لازم نفرق بين المستوى الثقافي وبين المستوى التعليمي لان التعليم مش مقياس في بلدنا
تحياتي

zainab elmosalamy يقول...

انا حر

شكرا لك

فعلا مش كل واحد متعلم بيكون مثقف

تحياتى

بستان الحب يقول...

ابنتى الفاضله اسمحى لى ان اعلق لك على الرغم من انك طلبتى التعليق من كل بنوته وكل شاب فانا لست بنوته ولست شابا انا ام واولادى اثنان منهم فى الجامعه لذلك احب ان ادلى بدلوى فى هذا الموضوع الهام،باختصار ابنتى الحبيبه الدين والخلق هما الاساس وبعد ذلك نسال انفسنا هل سنكون فى حاله من الخجل ونحن نقدم العريس او العروس لاصحابنا او اقاربنا؟فان شعرنا بهذا الخجل فلابد ان نضيف اشياء اخرى الى جانب الدين والخلق ،اما اذا كنا فى حاله من الفخر والاعتزاز بهذا الدين وهذه الاخلاق دون الالتفات الى شىء آخر فالنتوكل على الله لن الدين والخلق تاج على راس صاحبه تدوينتك هادفه ومدونتك جميله تقبل الله منك

zainab elmosalamy يقول...

بستان الحب

نورتينى و شرفنى تعليقك

معك فى كلامك ولكن هل إذا شعرت الفتاة بالخجل هل يكون عليها ذنب؟

تحياتى

عاشقة الجنة يقول...

سؤال خطييييييييييير

وملاحظاتك على البنات اللي بيقبلواالإرتباط بمن هم أقل منهم مؤشر غير صحي بالمرة

تحليلي للموضوع ده إته بيحصل لسببين :

أولهم : الإنخداع بكلمات الحب المعسولة وتصديقها وإلغاء العقل تماما

ثانيهم : خوف البنت من إنها توصل لسن كبير ويفوتها قطر الجواز فبتقول يللا عصفور في اليد

أما عن رأيي في الارتباط بمن هو أقل مني

طبعا لاااااااااااا مستحيل وماينفعش حتى لو كان ملاك

ظروف البيئة والتربية واختلاف الثقافات والميول وانخفاض المستوى المادي وحتى ارتفاعه هيسبب مشاكل كتير يعقبها الندم والخاسرة دائما بتكون البنت لأنها بتحمل لقب مطلقة وبتتجرع مرارة كأس الفشل وحدها وكأنها من مجرمي الحرب

لاحظي يا زينب أنا قلت وارتفاع المستوى كمان يعني ارتباط البنت البسيطه قوي براجل غني جدا ومن طبقه عاليه كتير برضه غلط إلا إذا كان جواها رغبة رهيبه في التغيير لجلدها والدوران في فلكه والتعايش الكامل لحياته بالشكل الذي يرضيه

موضوعك جميل والسؤال يستحق فعلا التفكير

خالص مودتي

و.تــحــيــاتـــي

zainab elmosalamy يقول...

حبيبتى عاشقة الجنه

انتى عندك حق فعلا فى السبب اللى قولتيه اللى هو عصفور فى اليد و خوفها من القطر اللى هايفوت

انا شايفه يا عاشقة الجنه ان المستوى الدينى و التفكيرى و العلمى و الثقافى مهمين جدا أهم من المستوى المادى

تحياتى