CLICK HERE FOR BLOGGER TEMPLATES AND MYSPACE LAYOUTS »

أهلا وسهلا نورتنى

الثلاثاء، 23 ديسمبر 2008

عايز تتجوز عروسه ولا إيه بالضبط؟؟؟؟؟




السلام عليكم و رحمة الله و بركاتهPhotobucket
أنا جايبه لكم النهارده موضوع بقى منتشر قوى بس مش عارفه بصراحه هو منتشر فى كل مكان ولا إيه و انتم بقى اللى هتقولوا لى وتعرفونى لما تعلقوا عليه .
فى حاجات غريبة كتير بنشوفها فى حياتنا ومن الحاجات دى بقى يا جماعه الموضوع اللى هتكلم فيه .
دلوقتى الشاب لما بيروح يتقدم لواحده عشان يخطبها هى عايزاكو تاخدوا بالكم من الحته دى يخطبها هى ، قبل ما يروح يتقدم تلاقيه بيسأل على حاجات غريبه مثلا يسأل هما عندهم ايه ؟ فلوس ولا عمارات و لا أراضى و باباها بيشتغل ايه؟ أصل أنا عايز حاجه تسندنى
بالله عليكم مش حاجه غريبه Photobucket
أنا عارفه طبعا إن مش كل الشباب كده أنا بتكلم عن فئه معينه بس لللأسف بقت منتشرة قوى ، الأمر من كده إيه لما عريس يروح يتقدم لواحده و يجتمع الطرفين أهل العريس و أهل العروسه و يقعدوا يتفقوا خدوا بالكم من الحته دى يتفقوا على الحاجات اللى هايجيبوها ، أنا مش عارفه بصراحه هما بيتفقوا ولا بيفركشوا
لأ و إيه العريس دلوقتى عاد بيسأل و يمكن كمان يتشرط تلاقيه مثلا يسأل هاتجيبى الغساله نوعها إيه فول أوتوماتيك ولا نص أوتوماتيك وغيره من الأسئله الغريبه ، طيب ياابن الحلال ماتسيبها تجيب حسب مقدرتها يعنى اللى تقدر عليه
أنا مره واحده صاحبتى كانت جايبه تليفزيون صغير تخيلوا معايا و فكروا عريسها يقولها إيه ؟؟Photobucket
إزاى تجيبى تليفزيون صغير و الشقه كبيره قال إيه التليفزيون مش هايبان فى الشقه وكانت Photobucketالخطوبة هاتتفسخ لا حول و لاقوة إلا باللهPhotobucket
بالله عليكم مش حاجه غريبه اللى بيحصل ده
أنا مش عارفه هو هايتجوز عروسه إنسانه و لا شقه و عفش
الرسول عليه الصلاة و السلام قال إيه يا جماعه إظفر بذات الدين تربت يداك
يارب يا جماعه ماكنش طولت عليكم
يلا بقى مع السلامه
Photobucketو ربنا يهدينا كلنا يارب
أنا منتظره أرائكم و تعليقاتكم
وبقول تانى يا جماعه إن الكلام ده مش لكل الشباب أكيد لسه فيه شباب رجاله عشان المدونين الشباب مايزعلوش
Photobucket

28 التعليقات:

انسانةعادية فى عالم مش عادى يقول...

ربنا يصلح الاحوال الجواز دلوقتى بيع وشراء
هى مجنش على ده بس يازينب على كل حاجة دلوقتى الشباب مش عايز بنات ملتزمة تعرف ربنا عايز بنت روشة ومهتمية بنفسها مش واحدة زى الغفر يبئا يستحمل اللى يحصل له

سمكه واحده يقول...

حلوه تلفزيون صغير والشقه كبيره
والله في حجات كتير جدا بقت غريبه في الدنيا دي وفعلا في ناس تسأل علي حجات واشياء مش بيبصوا للشخصيه الاول هل دي هتقدر تبقي كويسه ويكون في توافق ولا ايه وتبقي بتخاف ربنا ومتدينه والحجات اللي احنا عرفنها
والله في كده وفي كده
وربنا يصلح الاحوال
بس عندك حق الموضوع ذاد اوي اليومين دول

zainab يقول...

حبيبتى أيوش
عند ك حق ياأيوش
ربنا يهدىشبابنا

zainab يقول...

سمكة واحده

عندك حق والله الحاجات الغريبه كترت

emey يقول...

الرجالة الان عايزين اللى يصرف عليهم وهما يتستتو ويعدو فى البيت

zainab يقول...

حبيبتى ايمى

عشان مانظلمهمش أكيد لسه فيه رجاله يعنى رجاله

Dr/ walaa salah يقول...

والله يا زينب واضح ان الايام دي الشباب عايز يتجوز تلاجه او شقه

كنا زمان احنا اللي بنتشرط في الحاجات دي

لكن دلوقتي والله بلاقي شباب بيتشرط وبيطلب طلبات في حاجات خاصه بالست زي مثلا المطبخ

يعني هو ايه دخله بالمطبخ دي حاجه تخص الست وبس


مش عارفه والله حاجات غريبه


ربنا يهدي

zainab يقول...

ولاءحبيبتى

وحشتينى ياقمر

فعلا حاجات غريبه

ربنا يهدى

emey يقول...

يمكن يكون لسة فى رجالة رجالة بس دورى عليهم بالملقاط وقبلينى لو لقيتى دفر راجل الرجالة ماتو فى 73

zainab يقول...

ايمى

دى تبقى خيبه و الله لوالرجاله ماتوا صحيح

بـسـمـــة صـــــلاح يقول...

السلام عليكم
هيييييييييي التعليق ال10
وبعد السلام يحلى الكلاااااااااااام
شوفي بقى يازوزو انا مليش في الكلام دا ومعرفش بصراحة الحاجات دي
هي هي هي هي انا لثه ثغننه جدا
بس كنت هموت من الدحك على التلفزيون صغير على البيت هههههههههههههههه
انما عقله صغنن بصحيح
بس انا نفسي اكون اول تعليق وااااااااااء يارب اكون المره اللي جايه البت ايوش على طول مستوليه عليه
انا هضربها علقه
...............................
يلا ياستي تأبلي ملولي
وتهياتي:)

zainab يقول...

بت يا بوسى
مش هتعقلى بقى عايزه تضربى أيوش
نعملك ايه مانتى اللى بتتأخرى
يلا روحى ذاكرى

ريمان يقول...

السلااااام عليكم

ازيك يا قمر

والله بجد فرحانه بزيارتك ليا

وعلى فكره المدونه دى شكلها رقيق اوى

وهاديه كده وظريفه

ما شا ء الله

وانتىت اتكلمتى فى موضوع مهم جدا جدا

وللاسف بيحصل كتير جدا

وبتلاقيها منتشره فى دمياط اكتر واكتر

فى جوازات بتتفشكل بسبب غساله او تلاجه

والله بتحصل

وحصلت لناس قريبين منى جدا

والحموات بقه بيتامروا وبيكلفوا العروسه فوق طاقتها وبيتشرطوا عليها

المفروض الواحد يكون عنده ذوق وقبل كده يكون عنده دين المفروض العريس يسيب للعروسه حريه الاختيار عاشن كمان حسب طاقتها الماديه

حاجه بجد غريبه

طب تعرفى انا واحده صاحبتى خطوبتها اتفشكلت بسبب ايه؟
بسبب الستاير العريس كان عايزها تعمل الستاير عند واحد معين بس الراجل ده كان بيعمل الستاير غالى جدا وهى طبعا ظروفها مكنتش تسمح

ولا حول ولا قوه الا بالله

تعرفى ان العرسان عندنا فى دمياط بيحبوا يتجوزوا من الشعرا؟

منطقه الشعرا اكيد انتى عارفاها

لان ال ايه بنات الشعرا دول بيجيبوا جهاز كتير جدا وغالى جدا
يعنى مثلا بدل مال تجيب فى عفشها 20 او 30 فوطه لاء بنات الشعرا بقه دول يجيبوا 100 فوطه مش عارفه هيعملوا ايه كل ده عاشن كده الشباب يحبوا اوى يتجوزا من هناك

انا بقى يا قمر ساكنه عند شركه المياه كده عند كوبرى المعلمين

وسعيده جدا بزيارتى لمدونتك يا قمر

مع تحياتى

ريمان

zainab يقول...

ريمان

فعلا يا ريمان حاجه غريبه
أنا مش مستغربه موضوع الستاير ده الظاهر انه بقى شئ عادى المفروض ناخد عليه

نورتينى يا قمر

E73 يقول...

بسم الله الرحمن الرحيم
السلام عليكم ورحمة الله وبركاته

أنا فعلا كنت دايما بفكر في الموضوع ده يا زوزو
حاجة غريبة جدا
وكذلك الحال في العروسة بصراحة مش هننكر إن في بنات برضه تفكيرها يشل
تحياتي يا قمر على مدونتك العسولة

zainab يقول...

الزعيمة

نورتينى فى مدونتى

عندك حق و الله فى بنات طبعا تفكيره يشل

تحياتى

marmar يقول...

فئه كبيره جدا من الشباب بقت بالمنظر البشع ده مش عارفه بصراحة دول ازاي يطلقوا عليهم لقب رجاله !!
دول عايزين البنت هيا الي تصرف عليهم وفي ناس كتييييييييييييير كدة
بصراحه دول بينزلوا من نظر الكلب مش نظر الانسان
ربنا يعينهم بجد
بص لو عريس اتقدم لاي انسانة ترفضوا على طول حتى لو كانت بتحبه لان اللي يهتم بالمظاهر التافهه دي محدش عارف ممكن يصحيها بعد كده من النوم يقلها فين الجبنه مين الي كالها زي في فيلم ابو علي .. اه ولله محدش عارف بجد
النهارده يسأل عل تلفزيون بكره يسأل عل صابون .. ناس متخلفة بجد
الحب والاحترام هما اساس الحياه بين اي طرفين لازم يكون في احترام متبادل
ولو مفيش هينعدم الحب .. يعني فين الاحترام لما بقول لواحده لالالالا تلفزيون ايه الي انتي جيباه دي بلا ارف .. ده اسمه قله احترام بمشاعر الطرف الي ادامي .. الرفض لاي انسان مريض بيعاني بالاهتمام لتلك المظاهر
الخارجيه فقط ..
تحياتي ليكي يا سكرة

marmar يقول...

زوزو السكره انا اسفه مش هقدر اشوف كل البوستات النهارده بس اوعدك هقراهم كلهم وارد كل يوم على كذا بوست بس دلوقتي مش قادره اصلي مصدعه جدا كان عندنا ضيوف ومشيوا ومصدعه منهم بس وعد هقرا كل يوم كذا بوست وارد عليهم يا سكرة

تحياتي ليكي
لا اله الا الله

zainab يقول...

حبيبتى مرمر

عندك حق والله انا شايفه برده ان الشخص اللى بالشكل ده يترفض

zainab يقول...

مرمر
شكرا يا عسل معلش تعباكى معايابس انتى عارفه رأيك مهم ليا

ألف سلامه عليكى يا قمر

فارس القمر يقول...

السلام عليكم ورحمه الله وبركاته

اختى زينب موضوعك جميل قوى

بس عاوز تعليق هقولك انا فى المسال مش مساله شباب بيطلب طلبات غريبه او جاى يفركش مش بربط

كل الحكايه انوا بيبقى عاوز على قد مابيجيب هو المثل اللى انت قولتيه شقه كبيرة وتليفزيون صغير انا معاكى هيا مش مشكله قوى ولكن تلاكيك
وحاجه كمان مش الشباب بس المفروض تقولى البنات كمان
فى ناس دلوقتى لما العريس يسجى يخطب بيقولوا انا عاوز دهب 10 او 15 الف
حاجات غريبه طيب ليه المبلغ دا كلوا يقوم الشاب اللى بيرضى بكدا انوا بيطلب طلبات غاليه جدا
وتبقى جوزاة اسمها بيع وشراء

احلى حاجه لما يكون الشاب بيحب اللى رايح يخطبها هما هيتفقوا مع بعض على هو هيجيب ايه وهيا هتجيب ايه

لانهم هما اللى هيعيشوا فى الشقه وعارفين احتاجاتهم ولوازمهم

وتعالى اليومين دول ماتقوليش ان الكبار هما اللى بيتفقوا لانهم بيبقى عارفين اكتر
دلوقتى لا فى بنت ولا شاب مش بيعرف لوازم وتكاليف الجواز تبتقى شكلها ايه

وعموما يعنى اليومين دول البنات بتعاكس الشباب ههههههههههههه

عقبال ما البنات تخطب الشباب ويجوا
يخطبوهم هههههههههههه
الدنيا خربت
استغفر الله العظيم حسبى الله ونعم الوكيل

انا لو فضلت اتكلم مش هسكت
خصوصا انى عشت الجو دا لكن الحمد لله ربنا كرمنى احلى كرم ناس طيبين وخطيبتى لاجمل ولا اطيب من كدا

تقبلى مرورى

اخوكى فارس

zainab يقول...

فارس

انت عندكحق فيه بنات ايوه بيطلبوا شبكه كبيره و كمان بيغالوا فى المهور انا مش بنكر كده
بس اصلى الموضوع ده منرفذنى فعلا بتاع الشاب اللى بيشرط أو اهله هما اللى يشرطوا
مش عارفه بجد حاجه تنرفز

أما بالنسبه للبنات اللى بتعاكس دى مصيبه ربنا يهديهم

ور بنا يخيلك خطيبتك و أهلها

سندريلا يقول...

بجد بقت حاجه تخنق هما عاوزين يبدئوا حياتهم زى ما بيتهوم وبعد كده شوفى بعد كل التحكمات دى هو هيعيشها ازاى ده لو معاه اصلا

zainab يقول...

حبيبتى سندريلا

شكرالك على مرورك

نورتينى

الفراشة الصغيرة يقول...

تصدقى الراجل عنده حق
ازاى الشقه كبيرة
والتليفزيون صغير
انتى غريبة قوى انتى كده تبوظى شكل الشقه اللى هو جوبها
ايه الغلاسه دى مع انى انا لو منها
كنت قولتله طيب انا مش هخليه فى البيت
وقلته احسن على الاقل نوفر كهربا
ولو عايز اشترى انت بقى الكبير وتتشرط ويجبهولها فلات كمان
هههههههههههه

zainab يقول...

الفراشه الصغيره

ههههههههههههههههه

انتى عسل و الله

نورتينى

عاشق الشهاده يقول...

هو ايه اصله ده
بقى الشاب هو اللي بيبوظ الجوازه
ده ظلم فاحش وافترى رسمي وعايز محضر في ااقرب قسم بوليس
اسمحيلي بقى
ده احنا لازم نتشرط ونتشرط وكمان نتشرط
مهر وشبكه وقايمه ومؤخر ومقدم وتقسيط
وشقه وفرح وعزومات وهدايا وليله كبيره اووووي عايزة مدونه لوحدها

ومش عايزة بعد ده كله تجييب العروسه تليفزيون كبير شويه
ياعني الراجل كمان هيجيب مع الشبكه عدسه مكبره يتفرج بيها ع التليفزيون
وكمان المهر اللي لو عمل بيه مشروع يبقى من اصحاب المليونيرات
بيضطر اسفا دفعه لاهل العروسه وبيروح وهو بيعيط وبيضرب نفسه ويقول انا كان مالي ياربي

يلا ربنا يهديكم



بس بس بس
خلاص بهزر
هتكلم جد
ياجماعه اللي يتشرط على حاجه تافهه زي كده يبقى حاجه من اتنين مفيش غيرهم
ياما مش عايز العروسه دي
يأما هو اصلا انسان مادي وزعلان على الفلوس اللي دفعها في الجوازه
بس بجد لو عايز العروسه عمره ما هيفكر في تلفزيون وكرسي هزاز والحجات دي

بس الصراحه عنده حق
ولا انا غلطان
فلوس الجوازه دلوقتي تبني مصنع وتشغل نص الشباب العاطل
ربنا يهدي الجميع
موضوع جميل بس خالي تماما من الحياديه
انتي منحازه يا اختي جدا
ما برده ساعات الجوازه بتبوظ بسبب الشبكه ولا المهر
مش ساعات لاء ده غالب الجوازات الفاشله كده
عايزين عريس مريش

عشانا عليك ياااارب

zainab يقول...

أخى عاشق الشهاده

اصبر عليا انت دخلت شمال مرة واحده

أولا أنا قلت فى البوست "أنا عارفه طبعا إن مش كل الشباب كده أنا بتكلم عن فئه معينه بس لللأسف بقت منتشرة قوى "
يعنى مش كل الشباب لكن فيه كتير بقى كده
ثانيا أنا مش بنكر أن أحيانا كتير برده أهالى العروسه بيغالوا فى الشبكة و المهور أنا مش بنكر كده

بس انا اتكلمت على الحاله دى لأنى شفتها كتير قوى

عندك حق فعلا يوم ما العريس بيدقق على حاجات مش أساسيه إما يكون مش عايز العروسه أو داخل على طمع

ربنا يرحمنا

أسعدنى تعليقك

تحياتى